Македонија со нови две победи може да очекува нов напредок за две места

Македонија во изминатите повеќе од една година има константен напредок на ФИФА-листата, откако претходно заглаво до најсрамното 166-то место, па сега стигна со пласманот на 68-та позиција, што е најдобар пласман во последните осум години. И овој пласман веќе во следните десетина дена исто така може да биде поправен, а за тоа се потребни – две победи.

Според пресметките на дел од познатите страници за рејтинг, Македонија со триумф против Лихтенштајн в сабота навечер во Скопје и со победа во Ереван против Ерменија, ќе стигна до 1.353 рејтинг-поени, што би можело да ни донесе нов напредок за две позиции, колку што напредуваа црвено-жолтите и минатиот месец по двете победи со Гибралтар и со Ерменија (по 2-0) на сартот на Лигата на нации.

Во сите други комбинации, без две победи, Македонија ќе назадува од најмалку за една позиција до дури девет позиции со два порази (1.316 рејтинг-поени), што никој не ни помислува на вакво сценарио, особено против тотален аутсајдер како Лихтенштајн и посебно со фудбалери кои се во исклучителна форма (Барди, Алиоски, Николов, Адеми, Трајковски, Тричковски...).

Македонија в сабота ќе го дочека Лихтенштајн, кого во минатата година во мундијалските квалификации двапати го победивме со вкупни 7-0 (3-0 на гости, 4-0 во Струмица). Три дена по овој меч е пресметката со Ерменија, која не остави никаков впечаток на првиот дуел минатиот месец во нашиот триумф со 2-0. Две победи од овие два меча, ќе значи речиси завршена работа за обезбедување на првото место во групата, па во ноември со мечевите против Лихтенштајн на гости и со Гибралтар дома само формално ќе се завери пласманот во плејофот, но и веројатно шансата да се најдеме во четвртиот барабан за ждрепката за Евро 2020, која на 2 декември ќе се одржи во Даблин (Р. Ирска).