Ангеловски: За Украина ќе биде трагедија ако загуби!

ОД БУКУРЕШТ, 
НИКОЛА БОГОЈЕВСКИ

Македонија на Еуро 2020 дојде како аутсајдер, па фаворитската улога им ја префрли на далеку пореномираните ривали, а со тоа и притисокот врз нив дека ќе мора да ги победат црвено-жолтите, па таа растеретеност треба да биде плус заедно со извлечените поуки од поразот со Австрија, за нов добар настап, ама сега и резулчтатски.

„Ние дојдовме на ова Европско првенство со цел да се бориме за пласман во следната фаза и таа цел сѐ уште стои пред нас, а нѐ чека меч со директен конкурент, кој како и ние има нула бодови и ова е своевидно финале. Победникот од овој меч ќе си ги зголеми шансите за пласман, а ние немаме притисок, зашто Украина е фаворит, а за нив ако не успеат да нѐ победат и да се пласираат понатаму тоа ќе биде трагедија. Затоа ние влегуваме максимално мотивирано, со голем респект кон Украина, да го задржиме тоа што беше позитивно од мечот со Австрија, а лошите моменти да ги поправиме“, рече селекторот Игор Ангеловски.

Тој посочува дека пред Македонија е еден тежок ривал, кој покажал дека е многу квалитетен против Холандија кога од два негатива успеа да се врати во мечот.

„Украина е исклучително квалитетна, а тоа се виде и со Холандија, кога од 0-2 успеаа да стигнат до 2-2, иако на крајот го загубија тој меч. Јермоленко, Зинченко, Малиновски и останатите се одлични фудбалери, добри индивидуалци кои играат во елитни клубови, ама и Македонија има одлични фудбалери, кои веќе многупати докажаа дека може да се носат со сите, па и со Украина“, вели Ангеловски.

Со кој тим селекторот ќе истрча и дали ќе има некоја промена во однос на првиот меч со Австрија, допрва ќе решава селекторот.