Алиоски: Белгија беше зрела да падне – сега одиме на победа против Казахстан!

06 јуни 2025 - 23:17

Македонската фудбалска репрезентација избори победничко реми во третиот натпревар од мундијалските квалификации благодарение на Езѓан Алиоски, кој со мајсторски погодок во самиот финиш ги постави конечни 1-1 против фаворизираната селекција на Белгија на Националната арена во Скопје.

Алиоски, кој во последниот период игра во одлична форма за својот клуб Ал-Ахли, по подолго време блесна и на репрезентативната сцена.

„Среќен сум што дадов гол, но жалам што не победивме. Белгија е добра селекција, но имавме шанси да ја совладаме вечерва. Сега целосно сме фокусирани на дуелот со Казахстан – сакаме победа“, изјави кусо стрелецот на голот за Македонија.

Жолто-црвените со ова реми остануваат во игра за првите две позиции во групата. Сега на табелата води Велс со 7 бодови, по победата над Лихтенштајн со 3-0. Македонија е втора со 5, следи Казахстан со 3, Белгија со 1 бод од еден одигран натпревар, а Лихтенштајн е последен без освоен бод и три порази. Мечот со Казахстан ќе го одиграме в понеделник на теренот на противникот.