Вердер со играч помалку надополни „минус два“, Лајпциг конечно победи дома (ВИДЕО)

30 август 2025 - 17:48

Фудбалерите на Баер Леверкузен долго ќе жалат за пропуштената шанса да дојдат до трите бода на гостувањето во Бремен, каде што примија гол во буквално последните секунди и мораа да се задоволат само со реми во пресметката со Вердер (3-3).

Нервозата ќе биде уште поголема ако се знае дека домаќинот последните два гола со кои изедначи ги постигна со фудбалер помалку. Леверкузен, кој е предводен од поранешниот не многу прославен тренер на Манчестер Јунајтед, Ерик Тен Хаг, преку Шик во петтата и Тилерман во 35. минута дојде во убедливо водство, додека Шмид од пенал пред крајот на полувремето ја намали негативата. Вердер во 63. минута остана со фудбалер помалку поради вториот жолт картон на Старк, кој направи пенал, а кој гостите го реализираа преку Шик за убедливи 3-1. И кога сите помислија дека победникот е решен, Шмид со вториот гол го намали резултатот во 76. минута, за во четвртата минута од судиското надополнување Кулибали да донесе огромна радост кај навивачите во Бремен.

Екипата на Лајпциг брзо се опорави по дебаклот на гостувањето кај Баерн Минхен (0-6) минатиот викенд, па дома го совлада Хајденхејм (2-0), со што стави крај на серијата од три меча без победа на домашен терен во Бундеслигата. Ајнтрахт Франкфурт како гостин го совлада Хофенхајм (3-1), додека Штутгарт минимално беше подобар од Борусија Менхенгладбах (1-0).

ФОТО: EPA PHOTO