Шампионот мајсторски го надигра Баерн, ама – не успеа да го победи (ВИДЕО)

Ова е најкраткиот и најпрецизниот опис на дербито од Бундеслигата, кое заврши без голови (0-0), а Баварците освоија бод што може да се покаже клучен во трката за титулата. Иако осум бодови предност не изгледаат недостижно во конкурентни лиги, кога Баерн Минхен е лидер, тоа обично значи крај на сите надежи. Историјата покажува дека во 99 отсто ваква предност е недостижна за ривалите.

Најголемата болка за навивачите на Леверкузен е фактот што нивниот тим веќе пет натпревари по ред не загубил од Баерн (шест ако се брои и Купот на Германија), но сепак, најверојатно, повторно ќе мора да се помири со фактот дека титулата ќе замине во Минхен. Особено тешко ќе биде да се прифати ремито на овој меч, каде што Леверкузен во целост доминираше, создаваше шанси и ги засени Баварците, но остана без конечна награда.

Домашниот тим двапати го погоди рамката на голот, а имаше уште неколку сериозни можности, вклучително и стоотстотна шанса на Флоријан Вирц во 90. минута. Истовремено, Баерн беше потиснат на историско ниско ниво – за првпат од 1992 година, откако се води напредна статистика, Баерн шутираше кон голот на противникот само двапати. Првиот обид на Хари Кејн во 73. минута беше блокиран, додека ударот на Леон Горецка во 81. минута заврши крај дирекот.