Роналдо ги нападна „ѓаволите“: Не веруваа дека е болна ќерка ми

15 ноември 2022 - 14:16

Ѕвездата на Манчестер јунајтед, Кристијано Роналдо се пожали дека раководството на тимот му се налутило зашто ги откажал подготовките пред почетокот на сезоната, а исто така се сомневале во него кога им кажал дека причина за тоа е болеста на ќерка му.

Роналдо во интервјуто со водителот Пирс Морган кажа дека две лица во клубот се сомневале во неговата причина за отсуството од подготовките.

„Разговарав со директорот и претседателот на клубот, тие не ми веруваа дека нешто не е во ред, па се чувствував многу лошо поради тоа. Никогаш нема да го менувам здравјето на семејството за фудбал“, вели Роналдо.

Португалецот, исто така, кажа дека семејството Глејзер, кои се сопственици на тимот, не се заинтересирани за спортски успеси.