Рој Кин со порака до играчите: Има многу „плачковци“ кои играат за Јунајтед!

03 октомври 2018 - 23:12

Манчестер јунајтед катастрофално ја почна новата сезона во Премиерлигата, па се соочува со големи проблеми во соблекувалната на екипата, а не му се пишува добро ниту на тренерот Жозе Мурињо.

Неколку легенди на клубот од „Олд Трафорд“ дадоа свое мислење за ситуацијата и некои од нив го критикуваа Португалецот, а последен се огласи легендарниот Рој Кин.

„Нормално е некој играч да не се согласува со тренерот на екипата и обратно. Но, јас мислам дека доколку си фудбалер  на клубот, ти треба да го дадеш својот максимум за екипата, без разлика на тоа што не си во добри односи со Мурињо“, објасни Кин.

Новинарите ги интересираше на кого мисли легендарниот играч, но Кин кажа дека истото мислење го дели за сите фудбалери.

„Не зборувам за Погба, туку за сите играчи во клубот. Има премногу ‘плачковци’ што играат за Манчестер јунајтед. Треба да играш за клубот, за градот, за себеси...“, кажа поранешниот играч на „црвените ѓаволи.“