По дебаклот на Интер, само две екипи останаа во игра за тројна круна

24 април 2025 - 09:45

Синоќа Интер доживеа тежок пораз од Милан во полуфиналето на Копа дел Реј по што стана јасно дека „нераѕурите“ нема да ја освојат својата втора триплета во историјата, по онаа во 2010 година.

„Нераѕурите“ се лидери во Серија А и ќе играат во полуфиналето од Лигата на шампионите, каде противник им е Барселона. Од можна тројна круна, не е исклучено Интер да остане и без трофеј бидејќи во домашното првенство е израмнет со Наполи на шест кола пред крајот на сезоната.

Во конкуренција за тројна круна сега остануваат само две екипи - ПСЖ и Барселона. Францускиот тим веќе ја освои титулата во домашното првенство, во финалето од Купот на Франција е голем фаворит против Ремс, додека во полуфиналето од Лигата на шампионите ќе се сретне со Арсенал.

Барселона уште ништо не освоила, в сабота се среќава со Реал во финалето од Копа дел Реј, лидер е на табелата во Ла Лига со четири бода предност пред истиот ривал, а во полуфиналето од Лигата на шампионите ќе игра против Интер.