Перез веќе има фаворит за наследник на Мурињо

18 октомври 2026 - 20:59

Претседателот на Реал Мадрид, Флорентино Перез, веќе го избрал човекот кој би можел да го наследи Жозе Мурињо доколку португалскиот стручњак не ги исполни целите во оваа сезона, објави шпанскиот новинар Серхио Валентин. Станува збор за Дидие Дешам, долгогодишниот селектор на Франција.

Валентин прв објави дека Реал сака да го врати Мурињо на „Сантијаго Бернабеу“. Сега тврди дека Перез пред најтесниот круг соработници открил кој би можел да ја преземе клупата доколку резултатите не се подобрат. Како еден од можните фактори што би можеле да ја забрзаат одлуката се наведува лош резултат на претстојното „Ел Класико“ против Барселона.

Мурињо ова лето потпиша договор до 2029 година, а Реал плати обесштетување на Бенфика за да го доведе. Сепак, заминувањата на Карло Анчелоти, Чаби Алонсо и Алваро Арбелоа покажаа дека во Мадрид договорот не значи многу кога нема трофеи.

Дешам не е ново име на „Бернабеу“. Тој беше меѓу кандидатите и пред доаѓањето на Мурињо, но претседателските избори во јуни го стеснија изборот, бидејќи од конкуренција отпаднаа тренерите кои требаше да ги водат своите репрезентации на Светското првенство.

Францускиот стратег остана без работа по освоеното четврто место на Светското првенство во Северна Америка, а на селекторската функција го наследи Зинедин Зидан. Според пишувањата на „Л'Екип“, Реал бил заинтересиран за Дешам уште во април, меѓу другото и поради неговиот добар однос со Килијан Мбапе.