Навивачите го критикуваа, а Волтемаде израмни рекорд на Роберто Баџо

23 октомври 2026 - 11:21

Ник Волтемаде беше една од ретките светли точки во ремито на Јувентус против Рен, а неговиот настап доби пофалби од италијанските медиуми. Иако „старата дама“ не успеа да стигне до победа на домашен терен и одигра 2-2 во третото коло од Лигата на Европа, германскиот напаѓач повторно покажа дека може да биде еден од најважните играчи на тимот.

Волтемаде беше директно заслужен за двата гола на Јувентус. Најпрво асистираше за погодокот на Зеки Челик, кој донесе водство за домаќините, а во второто полувреме ја презеде одговорноста и реализираше пенал за конечни 2-2.

Со погодокот против францускиот тим, Германецот испиша и важна страница во историјата на клубот. Тој постигна гол на секој од своите први три европски натпревари за Јувентус, достигнување што претходно им успеало само на Роберто Баџо во 1990 година и на Дарко Ковачевиќ во 1999 година.

Италијанските спортски весници не го криеја воодушевувањето од неговиот настап. „Газета дело спорт“ истакна дека натпреварот ги покажал најдобрите квалитети на Волтемаде, особено кога добива слобода да дејствува зад класичен напаѓач, позиција на која најмногу му одговара да игра. „Кориере дело спорт“ оцени дека Германецот конечно презел поголема одговорност во дресот на Јувентус, додека „Тутоспорт“ го издвои како играч што најмногу го покажал вистинскиот натпреварувачки дух во составот на торинскиот гигант.

Пофалбите се значајни и поради состојбата во која се наоѓаше Волтемаде на почетокот од својот престој во Јувентус. Неговиот старт не беше според очекувањата, му требаше извесен период да се адаптира, а за тоа време доби еден куп критики од навивачите кои го прогласија за најлошо засилување во историјата на клубот.