Модриќ емотивно се збогува со Реал Мадрид и го круниса својот наследник (ВИДЕО)

И покрај тоа што го заврши настапот со тежок пораз, стадионот и фудбалската јавност сведочеа на емотивен и трогателен крај на една славна ера. По натпреварот следеа емотивни сцени – аплаузи од соиграчите, тренерите, навивачите и дури и од противниците. Иако заминувањето беше далеку од идеално, Модриќ беше испратен со голема почит. Хрватот вчера, во интервју за клупската телевизија, зборуваше за емоциите, незаборавните моменти, личниот напредок и фактот дека е најтрофејниот фудбалер во историјата на клубот со вкупно 28 освоени трофеи.

„Реал Мадрид ми даде сѐ – како фудбалер и како личност. Ќе останам вечно благодарен. Ќе бидам мадридиста засекогаш,“ изјави Модриќ.

Тој додаде дека бројките го исполнуваат со гордост, но уште поголема е љубовта што ја добил од луѓето.

„Не можеш да ги измамиш навивачите. Тие не те сакаат само затоа што играш за Реал. Нивната наклонетост беше поголема од сѐ што можев да замислам“, дополни тој.

Модриќ посебно му се заблагодари на претседателот Флорентино Перез, велејќи дека чувствувал посебна емоција и поддршка од него, а сцените со неговите солзи по последниот натпревар ја покажале нивната близина и поврзаност.

„Никогаш порано не сум го видел претседателот да плаче. Тоа ми покажа колку ме сака. Ќе му бидам вечно благодарен“, искрен беше Модриќ.

Како најзначаен момент од кариерата во Мадрид, го издвои освојувањето на десеттата титула во Лигата на шампиони (La Décima), бидејќи таа победа ги симболизира вредностите кои го дефинираат Реал Мадрид. На прашањето како би сакал да биде запаметен, Модриќ одговори.

„Нека ме паметат како добар човек, а потоа и како фудбалер кој секогаш даваше сѐ од себе, со почит кон сите – соиграчи, противници, навивачи“.

По враќањето во Мадрид, една сцена привлече големо внимание – Модриќ на аеродромот му го подари дресот на млад соиграч, за кого шпанските медиуми тврдат дека е Арда Ѓулер. Овој гест симболично беше протолкуван како „предавање на круната“ на неговиот наследник. Станува збор за 20-годишен Турчин, кој дојде во Реал пред две години од Фенербахче за 24 милиони евра. Досега има 61 настап, 12 гола и 11 асистенции.