Милан не бил прва опција за Модриќ – прво бил одбиен од клуб од САД!

30 јуни 2025 - 11:51

Легендарниот хрватски фудбалер, Лука Модриќ, долгогодишниот престој во Реал Мадрид ќе ја заврши на претстојното Светско клупско првенство (СКП), но неговиот следен чекор не е таму каде што самиот посакувал.

Неговата желба била кариерата да ја продолжи во Интер Мајами, клубот на Лионел Меси, но американскиот тим го одбил неговиот трансфер – со што хрватскиот ас се свртел кон Милан. Агентите на Модриќ го понудиле не само неговото име, туку и можни трансфери на Нејмар и Кевин Де Брујне во Интер Мајами, но управата на американскиот клуб останала доследна на својот концепт и одбила ангажирање на нови суперѕвезди и покрај гламурозниот предлог.

По ова одбивање од САД, фокусот на Модриќ се префрлил кон Европа. Италијанскиот гигант Милан понудил договор што целосно одговарал на условите на 38-годишниот плејмејкер, и трансферот ќе биде финализиран веднаш по крајот на клупскиот мундијал.

Модриќ е дел од Реал Мадрид од 2012 година и за 13 сезони освои 28 трофеи, вклучувајќи пет титули од Лигата на шампионите, три од Ла Лига, два пехари во Купот на кралот и пет успеси во Светското клупско првенство.