Леванте е подготвен да го продаде Барди, ако дојде примамлива понуда за македонскиот ас
Според весникот „Ла Разон“, од Леванте наводно посочиле дека седум фудбалери се на „трансфер листа“ и за нив може да се преговара, но само под услови тие трансфери да донесат голем финансиски бенефит, а меѓу нив е и Барди. Но, сето тоа ќе зависи најмногу од фактот колку и што ќе понудат заинтересираните страни за фудбалерите кои високо котираат со цена во клубот.
Покрај Барди, Леванте е подготвен да преговара и за Кампања, Аитор Фернандез, Садику, Ернани, Вукчевиќ...
Барди пред еден месец се поврзуваше со трансфер во Арсенал, после информации од Шпанија дека „топчиите“ веќе испратиле примамлива понуда, а наводно сериозен интерес има и од Лацио, Фиорентина, од градскиот ривал Валенсија, како и од два бундеслигаши. Барди има договор со Леванте до 2022 година, има откупна клаузула од 50 милиони евра, а од поодамна шпански медиуми посочуваат дека Леванте не прифаќа сума помала од 25 милиони евра.
Во изминатиов период, од раководството на клубот, веќе објавија дека очекуваат Барди да остане и за следната сезона, зашто македонскиот репрезентативец не истакнал желба да си оди, а конкретна понуда за него нема.