Јунајтед тргна по Де Јонг, понудата е меѓу 30 и 40 милиони фунти

07 август 2024 - 17:57

Раководството на Барселона сака летово да се ослободи од Френки де Јонг и неговата висока плата, а можеби ќе успее во тоа ако вродат со плод преговорите со Манчестер Јунајтед.

Англискиот новинар Мајкл Плант денеска објави дека „ѓаволите“ ја испратиле првата понуда до Барселона која е далеку од вредноста на Де Јонг, но не е чудо да биде прифатена бидејќи е во рамките на онаа која ја одреди шпанскиот вицешампион.

„Манчестер Јунајтед направи чекор кон Френки де Јонг. Премиерлигашот е расположен да даде меѓу 30 и 40 милиони фунти за него, но останува нејасно дали Ханси Флик ќе дозволи трансфер“, пишува, меѓу другото, Плант.

Де Јонг е повреден од Европското првенство и најверојатно ќе го пропушти стартот на новата сезона. Тој е втор најплатен играч во екипата на Барселона и воопшто во Ла Лига, зад Левандовски. Наводно, Де Јонг е расположен да почне преговори со Јунајтед околу личните услови.