И првиот човек на ФИФА испрати сочувство за смртта на големиот Дојчиновски!
Тој почина завчера на 78-годишна возраст и ќе остане запаметен како прв Македонец кој настапил на еден Мундијал и тоа во 1974 година на првенството во Западна Германија и тоа како репрезентативец на тогашна СФР Југославија.
„Кирил Дојчиновски е вистинска легенда на југословенскиот фудбал и еден од најголемите во неговата генерација. Ќе ни недостасува неговата фудбалска големина, лидерството, но уште повеќе неговата човечка и хумана величина“, се вели меѓу другото во дописот на Инфантино до македонската „Куќа на фудбалот“.
Дојчиновски поради огромните заслуги за македонскиот фудбал е добитник на бројни признанија меѓу кои и Наградата за животно дело од Македонскиот олимписки комитет, како и признанието од белградска Црвена Звезда, за една од најголемите легенди во историјата на клубот.