Флик им дал три слободни дена на фудбалерите и им порачал: Не одете далеку

10 февруари 2025 - 22:30

Со оглед на тоа што оваа недела Барселона нема обврски, а следниот натпревар го игра дури на 17 февруари, тренерот Ханси Флик одлучил да ги почести фудбалерите и почнувајќи од денеска им дал три слободни дена кои можат да ги искористат како сакаат.

Сепак, кога им го соопштувал тоа, како што тврдат медиумите во Каталонија, германскиот стручњак потенцирал дека не е прифатливо да одат далеку, туку овие денови треба да ги искористат за одмор и рекуперација по напорниот распоред во претходните 40 дена од почетокот на 2025 година во кои одиграа дури 11 натпревари. На такво нешто го учат постапките на фудбалерите од периодот пред новогодишните празници, односно по завршувањето на „есенската“ полусезона во Ла Лига.

Тогаш Флик исто така им даде три слободни дена на своите фудбалери, а тие место да одмораат, отишле на долги патувања. Најекстремни биле Ламин Јамал и Дани Олмо кои отишле во Дубаи, односно САД.