Дури 20 клубови го бараат супер талентот - Халанд!
Беше јасно дека младиот Норвежанец има неверојатен инстинкт за гол, но никој не очекуваше дека толку брзо ќе прерасне во одличен стрелец. Сезонава тој е лидер на листата на стрелци во Лигата на шампиони со шест голови, а во сите натпреварувања за Салцбург постигна 22 голови на 15 натпревари.
Овие бројки не останаа незабележани од европските гиганти. Јувентус е подготвен за младиот голгетер да плати 40 милиони евра уште во јануари, но италијанскиот шампион ќе има сериозна конкуренција во Манчестер јунајтед и тоа поради менаџерот Оле Гунар Солшер, кој добро го познава фудбалерот од деновите во Молде.
Салцбург очекува понуда од минимум 60 милиони евра, а на листата на заинтересирани клубови се и Реал Мадрид, Манчестер сити, Арсенал, Баерн Минхен, Атлетико Мадрид, Барселона, Челси и многу други.
Сите ови клубови имаат испратено скаути да го следат Норвежанецот, па во јануари или можеби идното лето ќе има вистинска борба за неговиот потпис.