Добри вести за навивачите: Нема шанси да си заминам од Барселона

Голманот на Барселона, Марк-Андре тер Штеген нема никаква намера да си замине од клубот ова лето. Германецот призна дека преговорите за нов договор се ставени во мирување.

Голманот го нема продолжено договорот само поради пандемијата, која е главна причина што неговиот агент и Барселона засега немаат постигнато договор.

„Нема никакви шанси да си заминам од Барселона летово“, вели Тер Штеген за „Кикер“. „Мојот агент и клубот имаа разговори за новиот договор, но истите прекинаа поради коронавирусот и не беше вистински момент да се зборува за договорот. Во време кога сите се загрижени за своето здравје и животи, решивме да ги одолжиме преговорите. Се чувствувам одлично во овој град и моето семејство исто така“, рече Германецот.

Ова се добри вести за навивачите на Барселона, кои беа загрижени од шпекулациите дека голманот можеби ќе бара нова средина ако не го продолжи договорот. Очигледно е дека Германецот е цврсто решен да остане на „Камп Ноу“.