Бормут го шокира Манчестер јунајтед, Евертон го запре Челси (ВИДЕО)

22 декември 2024 - 16:54

Манчестер јунајтед доживеа срамен пораз на „Олд Трафорд“ против Бормут (0-3), додека Челси немаше муниција на гостувањето кај Евертон на „Гудисон Парк“.

Хујсен по половина час игра ги шокира „ѓаволите“ и погоди за предност од 1-0, по што Јунајтед се обидуваше да ја врати неизвесноста, меѓутоа не ги искористи своите шанси.

Казната стигна во 61. минута кога Клајверт од пенал зголеми на 2-0, а само две минути подоцна Семењо стрелаше за предност од 3-0.

Челси и Евертон одиграа возбудлив натпревар на „Гудисон парк“, односно двете екипи имаа одлични шанси за погодок, меѓутоа голманите беа на висина на задачата.

„Сините“ на Енцо Мареска беа за нијанса под нивото од претходните дуели и тоа јасно можеше да се забележи на теренот, меѓутоа Челси освои важен бод на непријатното гостување.

На останатите натпревари Вулвс славеше со 3-0 против Лестер, додека Саутемптон и Фулам одиграа без голови (0-0).