„Алиоски многу ни недостига во Лидс, ама тоа го сфаќаме сега откако си замина“!
Алиоски мина четири години во Лидс, три во Чемпионшип и една во Премиерлигата и беше стандарден кај Марсело Биелса, а стана омилен кај навивачите поради лудориите и посветеноста да „изгине“ за дресот на англискиот премиерлигаш. Дориго, кој инаку е и поранешен англиски репрезентативец (15 настапи од 1989 до 1993), сега смета дека на Лидс му недостига Алиоски од многу два клучни аспекти – карактерот и енергијата која со себе ја носи!
„Кога зборуваме за играчи со карактер, Џани Алиоски е еден од тие кој многу значеше за тимот, за навивачите... И понекогаш одредени фудбалери не се ценети колку што е потребно, а кога ќе си заминат сите го сфаќаат тоа. И таков е случајот со Алиоски. Дали Џани е најдобар лев бек? Далеку од тоа, ама тој за овој клуб кога играше даваше сѐ од себе и на тимот му даваше посебна димензија.
Зашто ова го зборувам, Алиоски е фудбалер со огромна енергија, човек кој може да го 'разбуди тимот', фудбалер кој за каузата ќе направи сѐ, а во случајот за Лидс беше подготвен на сѐ. Дури тоа да станува збор за еден дуел, за една лудост што ќе ја направи. И ако ја погледнеме сезонава досега, ако бараме нешто во неа, нема, празно е, а на овој тим му недостига нешто, во случајот очигледно е тоа Алиоски“, пишува Дориго, кој има нас 100 настапи и за Астон Вила (1983-1987) и за Челси (1987-1911).
Алиоски летоска како слободен играч си замина од Лидс и потпиша за саудиски Ал Ахли, а на негово место за 15 милиони фунти дојде Жуниор Фирпо, но не ја убеди досега англиската јавност дека е подобро решение од Алиоски на лев бек, а проблем повеќе е што има и мака со повреди, за разлика од македонскиот репрезентативец кој лани во 90 отсто од мечевите беше стартер и не запре со трчање на мечевите, патем даде и три гола и запиша три асистенции.
Левиот бек откако со Македонија испиша нова историја со пласманот во мундијалскиот бараж доби еден куп пофалби и честитки од Англија и навивачите на Лидс, кои не го забораваат, зашто без оглед и на безбројните критики, им беше еден од најомилените ликови во тимот, а и соиграчите го обожуваа зашто беше „диригент за добра атмосфера“.
Лидс сезонава по 12 кола, безмалку третина од сезоната, има само 11 бода (две победи, пет ремија и пет порази) и е прв над зоната за испаѓање, два бода пред Барнли, а три пред Норич.