Новаци ќе го спасува Пелистер

Откако општина Битола и акционерите се испокараа, кој на кого му должи, а главните акционери се повлекоа од клубот, вистински егзодус се счучи на „Тумбе кафе“ и сите фудбалери се разбегаа од клубот кој е пред пропаст. Останаа само битолчаните, па сега единствен спас за да се истурка сезоната е кај куп-победникот многуте празни места да се пополнат со фудбалери од младиот погон, но и со играчи од второлигашот Новаци.

Во Битола веќе се најавува дека Новаци ќе му помага на Пелистер, а затоа што второлигашот е последен и со многу минимални шанси да се спаси од испаѓање во Третата лига, нема да биде чудо утре да се појават поголем дел од тие фудбалери на „Тумбе кафе“. Ваквата неочекувана „фузија“ доаѓа затоа што Пелистер нема начин во момент кога нема скршен денар, а има отворени пршања за својата иднина да донесе засилувања со кои би играле поголема улога во вториот дел од сезоната.

Битолчани се полуфиналисти во Купот, но се претпоследни на табелата, па напролет прва цел многу повеќе ќе им биде обезбедувањето на прволигашки статус, отколку битка за трофејот, кој во ваква ситуација покрај далеку поамбициозни клубот е речиси недостижен.

Се уште е неизвесно кој се од фудбалерите и колку од нив ќе се појават на првиот тренинг, односно со кои играчи Секуловски ќе се обиде да обезбеди опстаникот во Првата фудбалска лига.

Со каков тим Пелистер ќе тргне во зимските подготиовки ќе биде познато утре, кога на прозивката ќе се појават фудбалерите.