Град Скопје изгласа помош за ФК Вардар, а колку пари ќе се префрлат ќе решава Арсовска

20 јули 2023 - 14:57

Советот на градот Скопје со 34 гласа „за“ и еден воздржан денеска изгласа финансиска помош за најтрофејниот македонски клуб Вардар, но без конкретна сума со колку пари ќе им се помогне на црвено-црните, за што ќе решава градоначалничката Данела Арсовска и соодветниoт градски сектор.

Иницијативата за помош на ФК Вардар ја поднесе докторот Никола Пановски, но ја подржаа безмалку сите советници и со 34 гласа ја изгласаа иницијативата, со усвоен заклучок со кој се овластува градоначалничката за издвојување на сума на пари за помош и изнаоѓање на најповолниот начин како да се реализира оваа помош.

Ова е втора иницијатива на град Скопје за помош за ФК Вардар, зашто пред повеќе од осум месеци имаше иста ваква помош со ребаланс на буџет, кога беа изгласани 250.000 евра, но тогаш сето тоа не помина во Mинистарството за финансии, па парите практично и не завршија во клупската каса.

Пред да дојде точката за помош на Вардар, советниците изгласаа амандман за ребаланс на буџетот за оваа 2023 година, со кој дополнителни 12 милиони денари (200.000 евра) се префрлаат во секторот спорт за поддршка на спортските клубови на територијата на град Скопје.