„Го купивме Тошевски за мали пари, а добивме напаѓач со европски калибар!“
Ростов го победи Лил во трката за ангажманот на младинскиот репрезентативец до 19 години и голем потенцијал, од кој Работнички има сериозна заработка, а според Менјаков – трансферот за мали пари е извонреден зашто добиле страшно перспективен фудбалер.
„Ние од зимоска го следевме Давид зашто на трансфер-пазарот имаше статус на ѕвезда во подем. И сега можам само да му аплаудирам на клупскиот менаџмент за завршениот трансфер, зашто Ростов за малку пари доби талент и напаѓач од европски калибар. Ова е доказ дека клубот не се плаши, носи храбри одлуки, а овој трансфер е избалансирана одлука и не е спонтана“, вели Менјаков.
Тошевски во недоиграната сезона имаше пет гола и три асистенции на 21 меч за Работнички, ама посебно беше во фантастична форма на стартот на пролетниот дел, кога беше клучен за серијата победи на „дебармаалци“ и нивната најава за спас. Сепак, пандемијата со коронавирус ја прекина таа серија, а ФФМ со одлуката никој да не испадне, практично ја прекина жестоката битка на „романтичарите“ за опстанокот.