Некогаш го викаа хрватскиот Меси, а сега тренира со – четвртолигаш од Загреб!

Искусниот фудбалер веќе неколку месеци е без клупски ангажман, откако му заврши договорот со холандскиот прволигаш Фортуна Ситард. Халиловиќ ќе ги користи капацитетите на Максимир во следните три недели, односно до почетокот на зимската пауза, со единствена цел да ја одржува својата физичка форма и максимално да се подготви за потрагата по нова фудбалска средина. Неговото пристигнување беше официјализирано преку видео-материјал објавен од страна на НК Максимир, во кој еден од локалните играчи ги довикува соиграчите со зборовите дека им фали уште еден човек за популарната „шева“, по што Халиловиќ се појавува со краток одговор и добива срдечен аплауз од присутните фудбалери.

Раководството на загребскиот клуб веднаш се огласи за да им посака добредојде на поранешната ѕвезда, истовремено демантирајќи ги евентуалните шпекулации за негов сензационален трансфер во нивните редови.

„Камп Ноу, Сан Сиро, а сега и нашиот Обој. Ален Халиловиќ во кариерата помина низ Барселона и Милан, како еден од најголемите таленти на хрватскиот фудбал, а овие денови тренира со нашите сениори. Ако веќе почнавте да составувате наслов за уште еден голем трансфер во Максимир, полека. Ален овие денови само ќе тренира со нашата екипа. Добредојде, Ален! Се надеваме дека на Обој ќе се чувствуваш како дома. А ние ќе го дадеме нашиот мал придонес за повторно да те гледаме на големите фудбалски сцени“, се наведува во официјалното соопштение на клубот.

Во своите почетоци, Халиловиќ важеше за еден од најголемите европски таленти, а поради извонредните технички способности и специфичниот стил на игра медиумите често го нарекуваа „хрватскиот Меси“. Како тинејџер дебитираше за загребски Динамо, по што оствари голем трансфер во Барселона каде што се приклучи на втората екипа. Според специјализираниот портал „Трансфермаркт“, неговата пазарна вредност на само 20-годишна возраст достигна дури десет милиони евра, но тој никогаш не успеа целосно да го реализира огромниот потенцијал кој му се припишуваше.

Во текот на својата турбулентна кариера, тој го носеше дресот на голем број познати клубови, меѓу кои Динамо, Барселона, Спортинг Хихон, ХСВ, Лас Палмас, Милан, Стандард Лиеж, Херенвен, Бирмингем, Рединг, Риека и конечно Фортуна Ситард, пред да остане без ангажман.