Комплетиран составот за Торино: Четворица дебитанти, нема место за Ѓоковиќ

Последното место го обезбеди шпанскиот тенисер Рафаел Ходар, кој профитираше од победата на Карлос Алкарас над Тејлор Фриц. Американецот имаше можност да се избори за пласман во Торино, но по поразот остана без шанса за настап на завршниот турнир.

Така, во Торино ќе играат Александер Зверев, Карлос Алкарас, Бен Шелтон, Данил Медведев, Флавио Коболи, Артур Фис, Френсис Тијафо и Рафаел Ходар. Први резерви ќе бидат Алекс де Минор и Тејлор Фриц.

Особено интересен е податокот дека дури четворица од осумте учесници ќе дебитираат на завршниот Мастерс. За првпат на ова натпреварување ќе настапат Италијанецот Коболи, Французинот Фис, Американецот Тијафо и Шпанецот Ходар. Токму приказната на Ходар е една од најинтересните. Пред само две години тој беше спаринг-партнер на истиот турнир, додека лани се наоѓаше на 166. место на светската ранг-листа и сè уште студираше на Универзитетот во Вирџинија. Сега ќе биде дел од осумте најдобри тенисери во сезоната.

Меѓу учесниците има и двајца поранешни шампиони. Зверев го освојуваше трофејот во 2018 и 2021 година, додека Медведев беше најдобар во 2020 година. Германецот воедно пристигнува како прв тенисер на светот и со деветтото учество на завршниот турнир. Натпреварувањето во Торино ќе се одржи од 15 до 22 ноември, а ждрепката за групната фаза е закажана за 12 ноември.