Крсте Велкоски останува во Сарајево до 2021 година

Велкоски во Сарајево дојде во 2014 година, а откако стигна и до шампионска титула во 2016 замина на Далечниот Исток, но се врати во клубот со 2017 и многу брзо ги собра симпатиите на навивачите на клубот, па заслужено ја носи и капитенската лента.

Македонскиот репрезентативец зимава имаше неколку конкретни понуди од Јужна Кореја, но се реши да остане на „Кошево“. Сезонава одигра 23 меча во сите натпреварувања и даде девет гола, додавајќи четири асистенции и беше еден од најдобрите фудбалери на Сарајево, кој стана есенски првак со пет бода повеќе од шампионот Зрињски.

„Веќе три ипол години сум во клубот, се навикнав, капитен сум и ја предводам екипата. Немаше многу размислување, брзо се договоривме. Јас сум среќен тука, задоволен од сè и се надевам дека така и ќе остане“, изјавил Велкоски.

Велкоски е поранешен фудбалер на Работнички, Металург, Пиатра, Енозис Паралимни, Инчеон и Сват Кат.