Динамо Загреб пред големо засилување: Пристигнува талент од ПСЖ

03 август 2026 - 11:53

Хрватскиот шампион Динамо Загреб е на чекор до реализација на уште еден интересен трансфер, откако постигна договор со младиот офанзивец Ноа Нсоки, кој треба да пристигне од редовите на европскиот шампион ПСЖ. Сепак, за трансферот да биде комплетиран, останува двата клуба да ја договорат конечната отштета.

Станува збор за 19-годишен француски фудбалер кој важи за еден од најперспективните производи на академијата на ПСЖ. Иако за него интерес покажуваше и португалска Виторија Гимараеш, Нсоки ја избрал понудата на Динамо, убеден дека во Загреб ќе добие поголема шанса за развој и настапи во сениорскиот фудбал.

Според информациите, Динамо испратил почетна понуда до ПСЖ, но францускиот клуб бара повисока сума за трансферот. И покрај тоа, преговорите продолжуваат и во Загреб владее оптимизам дека договорот ќе биде финализиран во наредните денови.

Доколку трансферот се реализира, Нсоки ќе биде уште едно значајно засилување за Динамо во пресрет на новата сезона и настапите на домашната и европската сцена.