Синер на три победи од враќање на првото место на АТП листата

31 октомври 2025 - 08:52

Кога на 8 септември годинава Карлос Алкараз се врати на чело на АТП листата, по победата на УС Опен, се чинеше дека нема никакви пречки таму да остане најмалку до завршувањето на Австралија Опен.

Неполни два месеца подоцна, првото место на Шпанецот виси и таму в понеделник би можел да се врати Јаник Синер. Шпанскиот тенисер од УС Опен настапи на само два турнира, во Токио каде ја освои титулата и сега во Париз каде доживеа елиминација уште во второто коло. За разлика од него, Синер играше повеќе, минатата недела триумфираше во Виена, а сега чекори и кон титулата во француската престолнина.

Ако успее да дојде до неа, ќе се врати на првото место на АТП листата, но не е многу веројатно дека таму ќе остане до крајот од сезоната. Дотогаш нема уште многу да се игра бидејќи останува уште завршниот Мастерс во Торино, од 9 до 16 ноември.

На него Синер брани 1.500, а Алкараз само 200 бода. Со оглед на тоа што со евентуален триумф во Париз, Италијанецот би бил во предност од 250 бода во однос на својот најголем ривал, јасно е дека нема долго да остане на чело и дека Алкараз многу веројатно ќе ја заврши годината на челната позиција.