Сензација во Индијан Велс: Медведев го растури Алкараз за финале против Синер!

Тој по 100 минути пеколна борба прекина две импресивни серии на Шпанецот – низата од 34 победи на тврда подлога, како и неговите 16 триумфи по ред во 2026 година. Медведев до третото финале во „калифорниската пустина“ стигна со агресивна игра, а клучниот момент се случи во вториот сет. При резултат 4-5, Русинот спаси две сет-топки – првата со форхенд винер, а втората со силен сервис – по што доминираше во тај-брејкот и го доби со 7:3.

Во првиот сет Алкараз немаше решение за сервисот на противникот, освојувајќи само седум поени на сервис на Медведев. Со оваа победа Медведев обезбеди враќање во Топ 10, а воедно му го нанесе и првиот пораз сезонава на Шпанецот. Тој во финалето ќе игра против Јаник Синер, кој во меѓусебните дуели води со 8-7, а славел и на осум од последните девет натпревари. Двајцата тенисери ќе се борат за 24-тиот трофеј во кариерата на Медведев, односно 25-тиот на Синер.

Кај дамите, финалето ќе го играат Елена Рибакина и Арина Сабаленка. Сабаленка ќе остане прва на ВТА-листата без разлика на исходот, додека Рибакина со евентуална победа ќе се искачи на второто место.