Драма на Ролан Гарос: Победи по пет часа борба, па заврши во инвалидска количка (ВИДЕО)

28 мај 2026 - 12:06

Чешкиот тенисер Јакуб Меншик се пласираше во второто коло на Ролан Гарос по неверојатна драма против Аргентинецот Маријано Навоне, но завршницата од мечот ги загрижи сите на стадионот во Париз.

Меншик славеше по речиси пет часа игра со 6-3, 2-6, 6-4, 1-6, 7-6, но веднаш по последниот поен се сруши на теренот поради тешки грчеви и целосна исцрпеност.

Натпреварот беше исполнет со пресврти, а двајцата тенисери доминираа во одредени моменти. Вистинска драма се случуваше во решавачкиот петти сет.

Навоне пропушти дури девет меч-топки, додека Меншик при водство на Аргентинецот од 5-4 мораше да се спасува и да остане во мечот. На крајот победникот беше решен во супер тај-брејк до 10 поени.

Во самата завршница Меншик имаше огромни проблеми со грчевите и едвај се движеше по теренот, но и покрај тоа успеа да ја реализира седмата меч-топка и да обезбеди пласман понатаму.

По победничкиот форхенд, Чехот падна на земја, а веднаш стана јасно дека нешто не е во ред. Тој им сигнализираше на судијата и лекарите дека не може да стане, а до него веднаш пристигна и Навоне за да му помогне.

Ситуацијата изгледаше сериозно, па на теренот пристигна и итна помош со инвалидска количка. По неколку минути Меншик сепак успеа да стане и самостојно да го напушти теренот, но веднаш по излегувањето седна во количката и беше пренесен кон соблекувалната.