Четвртфинале за Ѓорческа во Марибор - по голема борба ја елиминираше четвртата носителка!

20 март 2025 - 13:30

Најдобрата македонска носителка Лина Ѓорческа одигра одличен меч и славеше победа на турнирот во Марибор од серијата В75 против Французинката Џесика Покет 2-1 (6-4, 2-6, 7-6).

Француската тенисерка која е 153. на ВТА листата и четврта носителка во Марибор влезе како фаворит во мечот против Ѓорческа, но македонската претставничка одигра одлично и заслужено обезбеди место во четвртфиналето.

Првиот сет Ѓорческа го доби со 6-4 за потоа Французинката да заигра подобро во вториот и да и дозволи на Ѓорческа само два гема. Одлучувачкиот сет донесе неизвесна борба која се решаваше во тај-брејк каде што Ѓорческа беше поуспешна со 11-9.

До победата Ѓорческа стигна за време од два часа и 37 минути игра. Ѓорческа на ВТА листата се наоѓа на 294. место, а утре ја очекува меч против Грузијката Мариам Болквадѕе која е нејзина партнерка во двојки на овој турнир.