Брињоне не скијаше, ама и покрај тоа го освои Големиот кристален глобус!

Ова е нејзина втора титула по триумфот во 2020 година. Брињоне пристигна во Сан Вали со предност од 382 бода пред Лара Гут-Бехрами, која сега нема шанси да ја стигне. Поради неповолните временски услови, откажани беа трките во спуст за мажи и жени, со што титулите во оваа дисциплина им припаднаа на Брињоне и швајцарскиот скијач Марко Одермат.

За Италијанката ова е прв мал кристален глобус во спуст, завршувајќи ја сезоната со 384 бода – 16 повеќе од Австријката Корнелија Хитер. На третото место заврши нејзината сонародничка Софија Гоџа со 350 бода. Кај мажите, Одермат веќе го обезбеди својот четврти последователен Голем кристален глобус, а со 605 бода ја освои и втората титула во спуст. На второто место се најде неговиот сонародник Франц фон Алмен со 522 бода.

Натпреварите продолжуваат во недела со трки во супервелеслалом во двете конкуренции.