АМС ја губи независноста, ќе ја „проголта“ министерството на Артан Груби?!

03 јуни 2022 - 12:15

Македонскиот спорт наскоро би можел да остане без своето неофицијално министерство односно без Агенцијата за млади и спорт (АМС), откако се сѐ погласни најавите за нејзиното „претопување“ во Министерството за политички систем и односи меѓу заедниците, каде што би ја загубила независноста, а со тоа и голем дел од ингеренциите.

Станува збор за владин орган предводен од Артан Груби, поранешен водач на навивачката група „Шверцери“, кој во иднина би се грижел за младите и за спортистите, секако ако биде официјализирана ваквата прегрупација. Во јавноста веќе има големи реакции на најавите за претопување на АМС во Министерство со кое нема апсолутно никакво допирни точки, а веќе има и официјални барања од невладини организација вакво нешто воопшто да не се случи.

Првичниот отпор доаѓа од Националниот младински совет на Македонија (НМСМ) и од Коалицијата на младинските организации СЕГА и Сојузот за младинска работа, кои со отворени писма бараат АМС да продолжи да работи најмалку како и досега, со можност дури да прерасне во Министерство за спорт и млади. Од спортистите засега нема реакции, иако последиците за нив би биле драстично поголеми, со оглед што федерациите и клубовите парите од државата ги добиваат токму преку АМС.

Од земјите во регионот, Србија, Бугарија и Црна Гора имаат Министерство за млади и спорт, во Албанија постои Министерство за благосостојба на младите и децата, додека во Косово функционира Министерство за култура, млади и спорт. Македонија со ваков потег би била единствена која не само ќе нема посебно министерство туку и владина агенција што ќе се грижи за младите и за спортистите.