И Летонија е пресилна за Македонија - втор пораз на одбојкарките

31 мај 2023 - 19:03

Македонската женска одбојкарска репрезентација во второто коло го доживеа вториот пораз во Сребрената европска лига, овојпат загубивме од Летонија со максимални 3-0 (25-23, 25-18, 25-18).

Денеска во салата „Борис Трајковски“, македонските одбојкарки уште еднаш беа поразени во меч од Сребрената европска лига, Летонија која важеше за фаворит, ја правда таквата улога и победи без да ѝ земеме сет.

Нашите одбојкарки беа одлични во првиот сет, го загубивме со 23-25, а играта најавуваше дека мечот ќе трае подолго, но не беше така.

Во вториот сет почнавме одлично, имавме водство од 6-3, но противникот го крена нивото, брзо го сврте резултатот и го доби сетот со убедливи 18-25. 

Со ист резултат заврши и третиот сет, со таа разлика што Летонија ја имаше доминацијата од самиот почеток и само го одржуваше водството до крајот.

Тамара Стојанова со 11 поени беше најдобрата одбојкарка во составот на Македонија, Симона Стојановска и Љиља Ковачевиќ имаа по шест поени, Марина Николова четири.

Следниот меч на Македонија е во сабота против Естонија со почеток од 17:30. Естонките имаат две победи по првите две кола и се на првото место на табелата.