Хуманоста пред сѐ: РФМ донираше 1,37 милиони денари на „СОС Детско село“!

Првиот човек на македонскиот ракомет, Живко Мукаетов и првиот оперативец Филип Милошевски симболично го предадоа чекот на износ кој и тоа како ќе им помогне на дечињата кои се штитеници на оваа институција.

„'Ви благодариме од срце! 460 деца и млади без родителска грижа растат во семејство благодарение на вас', пишува на врамениот дрес кој РФМ го доби од организацијата „СОС Детско село“ по повод примо-предавањето на донацијата. Вкупниот износ кој е собран од продажбата на билети за хуманитарниот ракометно музички спектакл одржан на 3 јануари во организација на РФМ, изнесува 1,372,550 денари, која сума ќе биде донирана на организацијата „СОС Детско село“.

Трошоците за реализација на настанот, покриeни се од страна на Ракометната Федерација на Македонија и нејзините спонзори. Посебна благодарност во оваа насока, Македонската куќа на ракометот, би сакала да упати до: „Триглав Осигурување“, „Алкалоид“ АД Скопје, „Халк Банка“, „Пивара“, „Никоб“, „Македонската Телевизија“, „ТВ Телма“, „Проевент“ и „КЛС“; како и до сите македонски уметници, компании и индивидуалци кои сесрдно ја прифатија поканата за учество во настанот без авторски или друг вид на надоместоци.

РФМ во оваа прилика би сакала посебно да се заблагодари на бројната публика во арената „Борис Трајковски“. Спектаклот „Сите Ѕвезди за СОС Детско село“ го славеше ракометот, го славеше спортот. Победи човечноста и хуманоста. Заедно покажавме дека македонската нација е хумана, а спортот има посебна моќ да нѐ вивне во височините и да ни пружи уникатна доза на среќа.

Сакајте го и негувајте го македонскиот спорт!“, се вели во соопштението од Куќата на ракометот.