„Во Вардар ми должеа и до 18 плати - барав пари од татко ми да преживеам!“

Хрватскиот репрезентативец, кој беше една од клучните фигури во освојувањето на двете титули во Лигата на шампионите, призна дека зад најубавата приказна во историјата на македонскиот клупски ракомет се криела далеку од идеална ситуација во таборот на „црвено-црните“. Според неговото сведоштво, за време на походот кон втората европска круна, тој останал без никакви финансиски примања повеќе од една година, што го довело до незавидна ситуација и сериозни размислувања за предвремен крај на професионалната кариера.

Говорејќи за тешките моменти низ кои минувал додека на теренот испишуваше историја со скопскиот гигант, искусниот среден бек откри дека бил принуден да бара финансиска помош од своето семејство.

„Кога играв во Вардар, тој период кога ја освоивме втората титула во Лигата на шампионите, немав земено плата од 15 до 18 месеци. Морав да барам пари од татко ми за да преживеам, а во еден момент му кажав дека размислувам и да се откажам од ракометот“, изјави Карачиќ.

И покрај огромните предизвици надвор од теренот и повеќемесечната неисплатеност, Карачиќ и неговите соиграчи тогаш демонстрираа неверојатен карактер, успевајќи да се издигнат над сите институционални и финансиски проблеми. Нивната посветеност резултираше со освојување на втората титула европски првак, подвиг кој и покрај тешката заднина, засекогаш останува врежан во аналите на македонскиот спорт. А, хрватскиот ракометар остана запишан во историјата на клубот како еден од најдобрите и најлојални на македонската гордост.