Фудбалерите тргнаа кон Шкотска во лов по првиот бод или барем - првиот гол (ФОТО)

Избраниците на селекторот Гоце Седлоски в петок ќе ѝ гостуваат на Шкотска (20.45 часот) на „Хемпден парк“, во рамките на петтото коло од Б-сегментот во ова натпреварување. Националниот тим заминува на едно од најтешките гостувања во групата со надеж за позитивен резултат и освојување на првите бодови, со цел да се поправи бледиот впечаток од досегашниот тек на циклусот.

Македонските фудбалери во моментов се наоѓаат во сериозна резултатска криза, откако на првите четири натпревари од Лигата на нации забележаа исто толку порази, притоа не успевајќи да постигнат ниту еден погодок. Поради ваквиот катастрофален биланс, дуелот во Глазгов претставува идеална, но и исклучително тешка можност за прекинување на црната серија и враќање на разнишаната самодоверба во таборот на националниот тим.

По завршувањето на пресметката со Шкотланѓаните, репрезентацијата нема да има многу простор за одмор и рехабилитација. Тимот веднаш ќе мора да ги започне подготовките за затворањето на овој репрезентативен прозорец, бидејќи веќе в понеделник на домашен терен ќе го пречека составот на Словенија во последниот натпревар од групната фаза.