Вардар со стил се одјави од Европската Лига: Монпелје се „тресеше“ во Скопје! (ФОТО)

По минатонеделниот пораз со десет разлика во Франција (23-33), „црвено-црните“ вечерва на домашен терен го победија Монпелје со четири разлика (27-24), но тоа ни оддалеку не беше доволно за сензационален пресврт. Сепак, Вардар ја одбрани својата чест, а го одбрани и домашниот терен каде сезонава не доживеа ниеден пораз во Европската лига.

Навивачите на скопскиот тим се понадеваа дека голем пресврт е можен кога Вардар во 20. минута поведе со 12-7 и практично ја преполови негативата од првиот натпревар. Со идентична разлика се замина и на голем одмор (17-12), а атмосферата во „Јане Сандански“ зовре во 34. минута кога македонскиот тим ги достигна највисоките +7 (20-13).

Истата предност подоцна ја имаше уште два пати, но Вардар, сепак, не отиде подалеку во својата цел. Монпелје направи серија од 3-0 за само -4 и потоа до крајот нашиот тим не се оддалечи на повеќе од пет гола предност.

Сега се виде колку Малку и Хориха недостасуваа на првиот натпревар бидејќи вечерва беа најефикасни во тимот на Вардар, постигнувајќи вкупно десет гола (шест Малус, четири Хориха). Воркапиќ додаде четири, а се истакна и Валах со дури 17 одбрани.

Со ова завршува европскиот настап на Вардар кој сега се врти кон домашните обврски и дуелот против Пелистер в четврток кога може да стави печат на шампионската титула, прва по пауза од четири години.