Поминаа ѕвездите од Кил, кој ќе биде јунак да купи билет за следниот меч на Вардар?
Досега поминаа две домашни кола за Вардар, во кои се соочи со Порто и со Кил, а не е тешко според имињата на противниците да погодите на која средба „Јане Сандански“ беше полна, а на која - не.
Сега повторно доаѓаме до иста ситуација се двата натпревара кои следуваат. На 3 ноември во Скопје доаѓа Мешков Брест, веќе „изџвакана“ екипа, не само од соочувањата во ЛШ, туку и од СЕХА-лигата, но во прв план е нејзиниот поскромен квалитет и рејтинг во однос на Кил, Веспрем и Кјелце.
Јунаците и вистинските навивачи на Вардар и љубители на ракометот ќе се познаат на овој меч, за кој цената на билетите е иста како и досега: 350 со 400 денари. Резултатите на Вардар паднаа драстично, клубот се посрамоти и со Кил и со Веспрем, но билетите се тие, испланирани од почетокот на сезоната, да соодвествуваат и со околу четири илјади веќе продадени сезонски.
По делот со Мешков, на 9 ноември во Скопје доаѓа Кјелце. Исто стар познаник, но екипа со далеку поголема магнетна сила, кога се во прашање навивачите, па како и во претходните случаи и овде се очекува дополнително пуштање за билети за стоење. И за оваа среда цените се исти, а продажбата на билетите почнува денеска, од 12 часот на билетарницата во „Јане Сандански“, како и онлајн, на www.ticketplus.mk.