Манасков и Пелистер го шокираа ПСЖ во последната секунда (ФОТО)

На домашен терен, првакот на Македонија одигра нерешено со ПСЖ (34-34) и тоа благодарение на голот на Дејан Манасков во последната секунда. Пелистер беше пред пораз затоа што гостите водеа со 34-33 и имаа напад, но ја загубија топката, а нашиот претставник го искористи тоа и дојде до големо реми, против еден од најсилните европски клубови.

ПСЖ водеше безмалку цело прво полувреме, имаше и +4 (12-8) во 17. минута, по 30 минути беше 18-15 за гостите, но Пелистер се консолидира во вториот дел и во 41. минута успеа да израмни на 24-24. Во 50. минута, битолскиот тим имаше и +2 (29-27), но следуваше серија од три гола на ПСЖ за ново преземање на водството. Кога ПСЖ наптави +2 се чинеше дека се е готово, но ракометарите на Пелистер продолжија да веруваат и тоа на крајот им донесе резултат.

Филип Кузмановски беше апсолутно најдобар играч на натпреварот со десет гола од 12 шута, Манасков постигна пет, а Видомски и Хенингман по четири. 

Во последното коло, идната недела, Пелистер гостува кај Барселона, но тој натпревар нема никакво резултатско значење.