Македонскиот „Спајдермен“ во идеалниот тим на завршницата од квалификациите за ЕП!

13 мај 2025 - 11:25

Голманот Мартин Томовски, се најде во идеалниот состав на последните две рунди од квалификациите за ЕП 2026, објави утринава Европската ракометна федерација (ЕХФ).

Овој избор е само потврда за брилијантната форма на македонскиот „Спајдермен“, кој блескаше во клучните мечеви против Естонија и Литванија, на кои имаше по 13 интервенции на секој натпревар. На гостувањето во Талин тој буквално ја „спушти ролетната“, а истото го повтори и во арената „Борис Трајковски“ во Скопје, каде македонската репрезентација го потврди пласман на уште едно големо натпреврување.

Покрај Томовски, во „дрим-тимот“ се најдоа уште и Тен Велде (Холандија), Белос (Австрија), Станчиуц (Романија), Теигум (Фарски Острови), Ромеро (Шпанија), Лигетвари (Унгарија), како и најдобриот играч според изборот – Французинот Ричардсон.