И во Германија има скандали: Банкротираше актуелниот шампион на Бундеслигата

Клубот од околината на Штутгарт четири години по ред е шампион на Германија, лани направи супер-тим и собра ракометарки од осум различни држави што резултираше со убедливо освоена титула во првенството, но очигледно сето тоа било со краток здив. Во клубот повеќе трошеле, отколку што заработувале, а дополнителен проблем беше откажувањето на главниот спонзор што дополнително го дестабилизира клупскиот буџет.

Раководството се обиде да ја амортизира состојбата со акција за собирање средства од навивачите, но место планираните 200 илјади, собра само 2.700 евра. Пред неколку недели клубот поднесе барање за стечај поради буџетска загуба од 500 илјади евра, од вкупно 3 милиони евра по што стана јасно дека нема повеќе да може да ги финансира своите обврски. Шпекулациите се дека вкупниот долг изнесува околу 2 милиона евра.

На ракометарките им било соопштено дека можат веднаш да ги раскинат своите договори и да побараат нови клубови, а сето тоа се случува на три недели пред стартот на новата сезона. Дури има и повици на Лудвигсбург да му се одземе последната шампионска титула поради сомнеж за манипулации и прикажување лажни финансиски извештаи. Веќе е познато дека норвешкиот Сола ќе го пополни местото на Лудвигсбург во Лигата на шампионите.