Елмас можел да дојде (и) во Вардар, ама не добил гаранции дека ќе биде во првиот тим!?

17 јули 2017 - 16:51

Многу од скаутите на македонските фудбалски прволигаши, меѓу кои и најтрофејниот клуб Вардар, го намирисале Елиф Елмас уште пред две години, но неговото инсистирање да тренира со првиот тим, ги „оладило“ луѓето кои сакале да го ангажираат. Секако, на оваа негова одлука влијаела и навиката на македонските екипи да не брцнат во џебот кога сакаат да ангажираат македонски играч. Исход на ова е – Работнички му даде место во првиот тим, можеби не брцна премногу во џебот, но сега го продаде на Фенербахче...

Вардар, Шкендија, па и Академија Пандев се екипите кои сакаа да го имаат Елмас во своите редови. Но, пред две години, обидите да го ангажираат пропаднале. И тоа најмногу поради фактот што никој не сакал да му го исполни единственото нешто што го барал тој и неговите родители – Елиф да тренира со првиот тим.

Работнички го ангажираше Елмас од редовите на фудбалска школа „Форца Вардар“ и многу брзо виде каков талент имаат во своите редови. Малиот Елиф доби шанса да игра и да тренира со првиот тим, па почна да напредува побрзо од очекуваното. „Нападите“ кон него да замине во Вардар, Шкендија или Академија Пандев пропаѓале веднаш откако немало да ги добие гаранциите за „дружење“ со првата екипа. Велат, можеби ќе се премислел ако добиел малку посериозна финансиска понуда, но и тоа го немало.

Работнички вчера го продаде Елмас на Фенербахче, а ова е прв ваков трансфер во историјата на Македонија – младинец со неполни 18 години директно од тука да замине во гигант од размерот на жолто-сините од Истанбул. Младиот фудбалер експресно се најде на радарот на големите клубови по неговите настапи на Европското младинско првенство во Полска, а Фенербахче ја доби битката за неговиот потпис, иако медиумите најавуваа интерес и од Бенфика, Галатасарај, Бриж, Манчестер сити...

„Дебармаалци“ во наредната сезона ќе бидат драстично ослабени, но контото на клубот ќе биде побогато. А и Работнички уште еднаш ќе докаже дека е клубот кој најдобро знае како да работи со младите категории во Македонија.