„Најголем виновник за заминувањето на Меси е бившата управа и – криминалното работење“
Според Лапорта, криминалното работење на поранешната управа предводена од Жозеп Марија Бартомеу е единствен главен виновник за ситуацијата и фактот дека Барселона ќе мора да започне нова ера без извонредниот Аргентинец.
„Единствени виновници за ова се луѓето што пред нас ја водеа Барселона. Тие носеа криминални одлуки и криминално работеа. Ни требаа неколку месеци за да ја сфатиме финансиската катастрофа и размерите од неа, а таа за два дена не може да се поправи и промени. Постојано наоѓаме нови проблеми во финансиските извештаи и нови дупки во буџетот. Некои одлуки што ги носеле е многу тешко да се разберат. Ние предвидувавме загуба од 200 милиони евра, испадна дека е – 487 милиони евра“, рече Лапорта.
Тој посочил дека го повикал Меси да дојде на денешната прес-конференција, но Аргентинецот одбил, а голема тага има во соблекувалната на клубот.
„Јас на Меси му предложив да дојде со мене на оваа прес-конференција, но одби и јасно ми е тоа, зашто е многу разочаран. Сакаше да остане во Барса. Во соблекувалната е голема тага, уште утринава разговарав со постарите фудбалери и им ја објаснив ситуацијата, дека ќе мора да продолжиме да победуваме без Лео. Нормално е во соблекувалната да владее тага зашто Лео нема повеќе да биде тука, но јасно им е дека ова е нова ера и дека се професионалци и ќе мора да продолжат без Меси“, додаде Лапорта.