Овие ЛОИ имаат и поинаков херој – дебелкото од Палау кој пливаше за свој ќејф (ФОТО)

06 август 2021 - 12:35

На овие Летни Олимписки Игри се пишуваат извонредни приказни, посебно кај медалоносците, ама овие Игри во Токио изродуваат и едни поинакви херои, за кои поголемиот дел од јавноста ќе се смее, ама нивната желба да бидат дел од најголемиот спортски настан е поголема од сѐ.

За земји како Палау, мал остров во Тихиот океан, секој настап на свој спортист е успех, зашто станува збор за земја со 18.000 жители, помалку од петина од бројот на жители во скопската општина Аеродром. А, од Палау во базенот се појави Шон Динглиус Валас, кој за разлика од сите пливачи „како извадени од калап“, изгледаше сосема нормално. Само еден обичен човек, со „пивски стомак“, ама во споредба со пливачите – дебелко.

И не оствари никаков специјален резултат, освен што успеа да ја заврши трката и во својата група дури не беше ни последен, четврти од шест пливачи. Успех што ја заврши трката како национален шампион на малата островска земја од Океанија.

Не беше дојден ни по медал, ни по рекорди, туку чисто спортски – да го почувствува олимпискиот дух и да се натпреварува.