„Трагедија на Брајант може да се спореди само со таа на Дражен Петровиќ!“

29 јануари 2020 - 14:37

Еден од најдобрите тренери во НБА лигата, Стив Кер, со својот Голден стејт успеа да освои се што можеше во најсилното клупско кошаркарско натпреварување. Исто така може да се пофали и со пет НБА прстени, од кои три со Мајкл Џордан и Тони Кукоч (со Чикаго), како и два со екипата на Сан Антонио.

Сепак, главна тема во американските медиуми изминатите неколку дена е смртта на легендарниот Коби Брајант, кој загина во хеликоптерска несреќа во неделата заедно со уште осум лица. Токму поради тоа Кер беше прашан дали според него ова е најголемата трагедијата која се случила во НБА лигата?

Мислам дека е така. Бевме подеднакво шокирани и кога дознавме дека Меџик Џонсон има ХИВ затоа што во 1991 година мислевме дека може да биде со нас уште само една година. Фала му на Бога, Меџик сè уште е жив, среќен и исполнет.

Но, доколку зборуваме за оние кои повеќе ги нема, и смртта на Дражен Петровиќ во 1993 година е иста како оваа на Коби Брајант. Коби е еден од најголемите досега. И за Дражен и за Коби, не можете да верувате дека се случи тоа, не ми дава да се помирам со тоа дека се случила таква трагедија, истакна Кер.