Последна шанса за Македонија да дојде до победа во 2026 година...

Македонската фудбалска репрезентација вечерва ќе ја има последната можност да стигне до победа во 2026 година. На Градскиот стадион во Скопје гостува Словенија во рамките на шестото коло од Лигата на нации, а избраниците на Гоце Седлоски ќе мора да прикажат многу подобро издание доколку сакаат календарската година да ја завршат со триумф и да стават крај на една загрижувачка резултатска серија.

Бројките доволно зборуваат за периодот низ кој минува националниот тим. Македонија е без победа на последните 13 натпревари, а последниот триумф го забележа на 7 септември минатата година, кога убедливо го совлада Лихтенштајн со 5-0. Оттогаш поминаа повеќе од 14 месеци, но репрезентацијата не успеа повторно да се израдува на победа.

Особено загрижувачка е реализацијата во актуелната година. На деветте досегашни натпревари во 2026, Македонија нема ниту еден триумф, забележа две ремија и седум порази, а постигна само еден гол, дело на Елмин Растодер на гостувањето против Шкотска, во последниот настап на нашата селекција, кој не беше доволен ниту за бод бидејќи домаќините славеа со 2-1.

Ниту настапот во Лигата на нации не донесе причина за оптимизам. Македонија ги загуби сите пет досегашни натпревари во групата, со гол-разлика 1-12, па пред последното коло е без освоен бод. Поразите од Швајцарија, Словенија и Шкотска ја оставија репрезентацијата во незавидна позиција и денешниот дуел е последна можност барем делумно да се поправи впечатокот од ова натпреварување.

Предизвикот е дополнително тежок ако се знае дека Словенија веќе ја совлада Македонија на првата меѓусебна средба во групата, со 2-0. Гостите доаѓаат со самодоверба од тој резултат, но и со императив да победат за да се задржат на второто место на табелата кое води во бараж за пласман во повисок ранг. Сепак, интересно е тоа што овој меч ќе биде петти меч на кој ќе ни гостува Словенија, а досегашниот биланс ни е речиси перфектен - три порази и едно реми. Евентуален триумф на Македонија вечерва би можел да ја зголеми самодовербата кај фудбалерите и тимот воопшто пред многу поважните квалификации за Европското првенство во 2028 година кои стартуваат во март.

Натпреварот Македонија – Словенија се игра вечерва со почеток во 20:45 часот, а ќе ја води холандска судиска постава, на чело со Сердар Гозубујук.