Taткото на Белингем дебитираше за ветераните на Англија и даде седум гола

03 ноември 2026 - 13:44

Марк Белингем покажа дека годините се само бројка, а неговиот неверојатен настап го заокружи одличниот викенд за семејството, бидејќи и неговите синови Џуд и Џоб имаа забележителни настапи.

Педесетгодишниот Белингем го предводеше нападот на англиската ветеранска репрезентација за фудбалери над 50 години на дуелот против Република Ирска, одигран во Кембриџшир.

Тој уште во првото полувреме постигна шест гола, а во вториот дел додаде уште еден погодок и асистенција, помагајќи ѝ на Англија да слави убедливо со 13-1. За Марк ова беше деби во репрезентативниот дрес, и тоа на начин за паметење.

Иако официјално се повлече од фудбалот во 2019 година, Белингем продолжи да настапува на ветерански турнири, пред да го прифати повикот за дуелот со Ирска.

Марк во март наполни 50 години, а во текот на својата кариера се изгради во едно од најпознатите имиња во пониските англиски фудбалски лиги. Според англиските медиуми, тој постигнал повеќе од 700 голови настапувајќи за клубови како Лемингтон, Стоурбриџ и Сатон Колдфилд Таун.

Неговата голгетерска ефикасност му го донесе и прекарот „Пеле на нисколигашкиот фудбал“, а со седумте погодоци на дебито за Англија уште еднаш покажа зошто го носи тоа признание.

Истиот викенд, постариот син Џуд го постигна својот јубилеен 50. гол за Реал Мадрид, во убедливата победа од 3-0 против Расинг Сантандер. Помладиот брат Џоб, пак, одигра одличен натпревар за Борусија Дортмунд против Баерн Минхен, кој заврши со резултат 2-2.