Eвролигата немаше милост, Звезда доби брутална казна поради вечното дерби!

02 ноември 2026 - 17:40

По случувањата на вечното дерби со Партизан, белградските ривали се соочија со казни, но Црвена звезда помина многу полошо од „црно-белите“.

„Црвено-белите“ ќе мора да платат дури 115.000 евра, а дополнително ќе бидат без поддршка од навивачите на следните пет гостувања. Причина за казната се инциденти, навредливо однесување, употреба на ласери, фрлање предмети на теренот, влегување на паркетот и недоволни безбедносни мерки.

Казната значи дека Црвена звезда нема да може да смета на своите навивачи на гостувањата кај Олимпијакос, Реал Мадрид, Армани, Барселона и Фенербахче.

Партизан, кој беше домаќин на дербито, исто така доби финансиска казна, но значително помала. „Црно-белите“ ќе треба да платат вкупно 49.000 евра поради пиротехника, ласери, навредливо однесување, фрлање предмети, влегување на теренот и пропусти во безбедноста.

На Партизан дополнително му е изречено условно ограничување на капацитетот на салата за сезоната 2026/27, кое ќе биде активирано доколку клубот повторно го прекрши соодветниот член од Дисциплинскиот кодекс.