УЕФА нема милост – ѝ затвори на Ц. Звезда голем дел од озогласениот Север!

Белградскиот клуб е санкциониран со вкупна парична глоба од 83.500 евра и делумно затворање на стадионот, откако опсежната истрага потврди прекршувања по неколку различни основи. Клубот е казнет поради расистичко и дискриминаторско однесување, палење и фрлање пиротехнички средства, како и испраќање пораки кои не се во согласност со карактерот на спортските настани.

Најголемиот дел од финансиската казна, односно точно 52.500 евра, е изречен поради истакнувањето на неспортските пораки на трибините, додека за употребата на пиротехника на сметката се додадени уште 6.000 евра. Како директна последица на активирањето на претходната условна казна изречена на 25 август оваа година за расистичко и дискриминаторско однесување, клубот од улицата Љутица Богдан ќе мора да го затвори секторот 3 на северната трибина за следниот домашен европски натпревар, на кој црвено-белите ќе го пречекаат тимот на Интер Ескалдес.

Покрај делумното затворање на трибината, за овој конкретен прекршок изречена е и дополнителна финансиска санкција од 25.000 евра, заедно со нова условна казна во времетраење од две години.